Skjersholmane reinseanlegg - oppstart av planarbeid

Detaljregulering for Skjersholmane reinseanlegg, gnr/bnr 46/423

Med heimel i plan- og bygningslova § 12-8 vert det varsla oppstart av detaljregulering for Skjersholmane reinseanlegg, gnr/bnr 46/423 mfl. PlanId: 202501

Storleik på området er om lag 40 daa, men avgrensinga er sett romsleg for å kunne vurdere ulike løysingar. Kva som vert den endelege avgrensinga av planen vil gå fram av planforslaget til offentleg ettersyn.

Føremål med planen

I dag ligg det eit eksisterande avløpsreinseanlegg ved Skjersholmane som er bygd med utgangspunkt i ein gjeldande reguleringsplan. Føremålet med reguleringa er å leggje til rette for etablering av eit nytt reinseanlegg for Stord kommune, som stettar forventa framtidige reinsekrav. Det er då behov for areal utover det som allereie er regulert per i dag.

Planstatus

Området er delvis regulert og delvis uregulert. Planen vil erstatte og oppheva:
- PlanID 201402 «Gnr/bnr 46/4, båthotell Skjersholmane»
- Delar av PlanID 201604 «Gnr/bnr 46/400 m.fl., Skjersholmane Småbåthamn»
- Delar av PlanID 201603 «Småbåthamn Hornelandsvågen, del av gnr/bnr 46/4».

Konsekvensutgreiing (KU)

Planforslaget vil falle inn under §8 konsekvensutgreiing utan planprogram, jf. Forskrift om konsekvensutredninger. Reinseanlegg inngår som eit tiltak i vedlegg II, punkt 11 c.